Antía Marante recomenda... el Meteorito de Amaia Arrazola

 

Amaia Arrazola, con debuxo e palabra escrita a man, rexistra a maternidade en tanto que tremor. Neste territorio inestable, de adaptación a unha nova realidade, Arrazola constrúe un diario xeneroso e atinadísimo onde comparte o que sente e reflexiona para ela, para todas as que vivan a experiencia despois e, tamén, para as que, quizais, no seu momento non revisaran o impacto dos seus propios meteoritos. Centrada na experiencia individual, El meteorito chega ás nosas mans, ademais, apelando á lectura en colectivo da experiencia para eliminar tabús, preconceptos e prexuízos. Grazas, Amaia, por toda esta luz.

Antía Marante recomenda...

Un ensaio que estoupa en múltiples voces. Un espello onde recoñecernos, tamén unha rede, unhas tesoiras ou dinamita.

Las hijas horribles axúdanos a tender pontes interxeracionais para iniciarmos un diálogo coas nais desde o coñemento e a empatía.

Blanca Lacasa ofrece un espazo onde poder poñerlle nome a aquilo que renxe no marco das relacións con determinados prototipos de nais, vítimas dun contexto abafante. Por iso, esta é unha obra que encerra a catarse colectiva dunha xeración de fillas que enfronta o retrato das súas nais para localizar fendas e entendelas, para poñer límites a certas esixencias ou para localizar feridas e, quizais, comezar a sandalas.

A existencia deste libro anima a imaxinar un futuro en loita contra o silencio e a rachar a tesoirazos os roles asfixiantes que o patriarcado escolleu para vestir as mulleres que nos precederon. Teas que aínda hoxe teiman por envolvernos.

Grazas a títulos coma este sentímonos parte dunha rede e erguémonos valentes e acompañadas coa vontade de revisármonos, dinamitando o pasado dalgún xeito para percorrer máis libres e coñecedoras o camiño que nos queda.

Lacasa Carralón, Blanca, Las hijas horribles,  Libros del K.O., 2023